Davíð Smári Lamude, þjálfari Kórdrengja, hefur verið dæmdur í fimm leikja bann vegna hegðunar hans við Egil Arnar Sigurþórsson, dómara á leik liðsins við Fram í Lengjudeildinni á dögunum.
Davíð fékk rautt spjald í leiknum fyrir kjaftbrúk. Framarar jöfnuðu leikinn í 2-2 stuttu síðar. Á þessum tímapunkti var leikurinn kominn í uppbótartíma. Eftir markið reiddist Davíð mjög og óð að Agli dómara til þess að láta hann heyra það.
Þjálfaranum var að endingu komið í burtu. Honum tókst þó til að mynda að hrifsa spjöld dómarans af honum í látunum.
Davíð fær fimm leikja bann fyrir athæfið. Þetta er annað rauða spjaldið sem hann fær í sumar.
Þá þurfa Kórdrengir að greiða 15 þúsund krónur í sekt vegna hegðunar þjálfarans.
Davíð mun ekki stýra Kórdrengjum í síðasta leik tímabilsins gegn Vestra. Þá mun hann einnig vera fjarverandi í fyrstu fjórum leikjum næstu leiktíðar vegna bannsins.
Kórdrengir, sem eru nýliðar í Lengjudeildinni, eru í fjórða sæti hennar með 38 stig. Liðið var lengi vel í baráttunni um að fara upp um deild en eiga nú ekki möguleika á því lengur.