Þorsteinn A. Jónsson, skrifstofustjóri Hæstaréttar, hefur látið af störfum eftir rúm 17 ár í starfi. Í tilefni þess kom starfsfólk réttarins saman síðastliðinn föstudag og hélt upp á langan feril Þorsteins.
Frá þessu er greint á vef Hæstaréttar.
Við starfi Þorsteins tekur Ólöf Finnsdóttir.
Ólöf lauk laganámi frá Háskóla Íslands árið 1988 og framhaldsnámi í lögfræði frá Cambridge University árið 2002.
Þá hefur Ólöf gegnt starfi framkvæmdastjóra dómstólasýslunnar frá stofnun hennar árið 2017. Áður var hún framkvæmdastjóri dómstólaráðs á árunum 2011 til 2017 og skrifstofustjóri Héraðsdóms Reykjavíkur á árunum 2006 til 2011.
Meðfylgjandi mynd var tekin við þetta tilefni en á henni má sjá frá vinstri Benedikt Bogason, forseta Hæstaréttar, Ólöfu Finnsdóttur, nýskipaðan skrifstofustjóra, Þorstein og Ingveldi Einarsdóttur, varaforseta réttarins.