Elías spilaði sig ekki út úr liðinu

Bo Henriksen, þjálfari danska meistaraliðsins Midtjylland og fyrrverandi leikmaður Fram, Vals og ÍBV, segir að Jonas Lössl hafi stigið skref framfyrir Elías Rafn Ólafsson á ný síðustu vikurnar og hafi því varið mark liðsins þegar það mætti Bröndby í dönsku úrvalsdeildinni í knattspyrnu í gær.

Elías Rafn fékk tækifæri í haust þegar Lössl meiddist og nýtti það vel. Hann hafði leikið síðustu átta leiki í deildinni, auk Evrópuleikja, og Lössl hafði mátt sætta sig við að sitja á bekknum fyrst í stað eftir að hann hafði jafnað sig af meiðslunum.

„Ég skipti um markvörð því Lössl hefur verið betri síðustu vikur. Þannig er þetta með alla leikmenn í hópnum, hvort sem það er hægri bakvörðurinn eða vinstri bakvörðurinn, þeir eru verðlaunaðir fyrir sína frammistöðu. Elías spilaði sig ekki út úr liðinu en Lössl spilaði sig inn í liðið. Það er frábært að vera með svona samkeppni," sagði Henriksen við bold.dk.

Midtjylland mætir Braga frá Portúgal í Evrópudeildinni á fimmtudaginn en Henriksen kvaðst ekki vera búinn að ákveða hver yrði í markinu í þeim leik. „Við metum stöðuna frá degi til dags og það kemur bara í ljós hver spilar á fimmtudaginn," sagði Henriksen.

Midtjylland er með fjögurra stiga forskot á FC Köbenhavn á toppi úrvalsdeildarinnar þrátt fyrir 1:2 ósigur gegn Bröndby í gær. Af sextán leikjum liðsins í deildinni á tímabilinu hefur Elías verið í markinu í níu leikjum og hinn 32 ára gamli Lössl, sem áður lék m.a. með Everton, Huddersfield og Mainz, hefur verið á milli stanganna í sjö leikjum.

• Blogga um frétt