Virkni fram­leiðslu­fyr­ir­tækja á Íslandi og ann­ars staðar í Evr­ópu hefur auk­ist tölu­vert á und­an­förnum mán­uðum og er hún nú nálægt því sem hún var áður en efna­hag­skrísan vegna útbreiðslu kór­ónu­veirunnar dundi yfir. Evr­ópskir fram­leið­endur benda á að fyr­ir­tækin hagn­ist á auk­inni einka­neyslu í Kína. 

Útflutn­ing­s­kippur og hærra álverð

Sam­kvæmt nýlegum tölum Hag­stofu um vöru­út­flutn­ing í sept­em­ber hefur virði útflutn­ings á iðn­að­ar­vörum minnkað lít­il­lega síð­ustu mán­uð­ina, miðað við árið á und­an. Í síð­asta mán­uði jókst útflutn­ing­ur­inn um rúman fimmt­ung milli mán­aða og nam tæpum 26 millj­örðum króna, sem er meira en með­al­tal síð­ustu tveggja ára. 

Auk­inn útflutn­ingur á iðn­að­ar­vörum er í sam­ræmi við þróun heims­mark­aðs­verðs á áli, en líkt og sjá má á mynd hér að neðan hefur álverð náð fyrri hæðum á síð­ustu mán­uðum eftir að hafa tekið skarpa dýfu við byrjun efna­hag­skrís­unnar í vor. 

Öfugt við þróun í þjón­ustu

Breska blaðið Fin­ancial Times greindi frá batn­andi árferði fram­leiðslu­fyr­ir­tækja í Evr­ópu fyrr í dag, en sam­kvæmt henni hefur iðn­að­ar­fram­leiðsla auk­ist tölu­vert í álf­unni á síð­ustu mán­uðum eftir mik­inn sam­drátt í vor.  Þessi þróun er öfug þeirri í þjón­ustu­geir­an­um, en virkni hans heldur áfram að minnka í Evr­ópu í síð­asta mán­uð­i. 

End­ur­reisn iðn­að­ar­fyr­ir­tækja hefur verið sér­stak­lega mikil á Ítal­íu, þar sem fram­leiðsla í geir­anum hefur náð sama stigi og hún var á áður en núver­andi kreppa skall á. Í Þýska­landi hefur iðn­að­ar­fram­leiðsla einnig aukist, þótt enn vanti tíu pró­sent upp á að hún nái fyrri styrk. 

Meiri neysla í Kína kemur til bjargar

Stór hluti iðn­að­ar­fram­leiðslu Evr­ópu­þjóða er í bíla­iðn­að­in­um. Á meðan eft­ir­spurn eftir bílum mælist enn lítil jókst hún milli mán­aða í sept­em­ber, auk þess sem hún hefur auk­ist utan Evr­ópu. 

Í við­tali við Fin­ancial Times sagði Stefan Klebert, fram­kvæmda­stjóri þýska fram­leið­and­ans Gea Group, sem fram­leiðir meðal ann­ars meira en helm­ing­inn af bjór­brugg­vélum heims­ins, að við­spyrnan í Kína leiði áfram eft­ir­spurn eftir vörum félags­ins. 

Blaðið tók einnig við­tal við Ola Kal­leni­us, sem er fram­kvæmda­stjóri bíla­fram­leið­and­ans Daim­ler, sem fram­leiðir meðal ann­ars Mercedes Benz-bíla. Kal­lenius sagði aukn­ing­una í sölu bíla í Kína hafa verið „stór­kost­lega“. „Þetta er nán­ast of gott til að vera satt,“ bætti hann við. „Kín­verjar hafa náð V-laga við­spyrnu í efna­hagi sín­um.“