Þórólfur Guðnason sóttvarnalæknir lýsti sig ósammála Kára Stefánssyni, forstjóra Íslenskrar erfðagreiningar, varðandi þá spurningu hvort heilbrigðisstarfsfólk eigi að vera í forgrunni þegar kemur að bólusetningum fyrir COVID-19.
Kári hefur látið hafa eftir sér að hann telji ekki að heilbrigðisstarfsfólk eigi endilega að vera í forgangi í bólsetningum. Kári telur að heilbrigðisstarfsfólk sé ekki útsettara fyrir smiti en aðrir. Þórólfur var spurður út í þetta á upplýsingafundi dagsins og sagði hann:
„Ég er ósammála Kára í þessu. Heilbrigðisstarfsmenn sem að eru í sjúklingakontakti þau verða í forgangi hjá okkur og eru það líka samkvæmt tilmælum Alþjóðaheilbrigðismálastofnunar.“
Vinna að skipulagningu bólsetninga er hafin og sagði Þórólfur að nánar yrði greint frá því síðar.
Þórólfur ítrekaði jafnfrant að bólusetning við COVID-19 væri á forræði sóttvarnalæknis eins og aðrar bólusetningar.