Það bjuggust margir við því að Fylkir myndi hafa yfirburði í Lengjudeild karla í sumar. Svo hefur ekki verið en liðið er þó í harðri toppbaráttu. Málefni Fylkis voru til umræðu í markaþætti Lengjudeildarinnar á Hringbraut í gær.
Fylkir er í þriðja sæti með 15 stig, jafnmörg stig og HK, sem á leik til góða. Eitt stig er upp í Gróttu, sem situr í öðru sæti.
Í síðasta leik gerði Fylkir 2-2 jafntefli við Aftureldingu eftir að hafa komist 2-0 yfir.
„Það vantar einhvern djöfulgang þarna upp á topp og fleiri sneggri leikmenn,“ sagði Hrafnkell Freyr Ágústsson, sérfræðingur þáttarins.
Hann segir jafnframt að spilamennska liðsins hafi breyst töluvert frá því í efstu deild í fyrra. Liðið féll niður í B-deild við lok tímabils. „Þeir voru að reyna að halda meira í boltann og svoleiðis. Þeir eru svolítið fallnir frá því og fara meira bara „direct.“ Ég held þeir þurfi mögulega að endurhugsa hvernig þeir ætla að gera þetta.“
Þrátt fyrir að Fylkir sé í toppbaráttu segir Hörður Snævar Jónsson, þáttastjórnandi, að liðið eigi að gera betur. „Það eru gerðar kröfur í Árbænum á að þetta lið fari upp þannig þeir þurfa kannski aðeins að bæta leik sinn.“