Lionel Messi er knattspyrnumaður ársins 2021 hjá franska knattspyrnutímaritinu France Football og hlaut þar með í kvöld Gullboltann, Ballon D'Or, í sjöunda skipti.
Messi átti frábært tímabil með Barcelona 2020-21 þar sem hann varð langmarkahæstur í spænsku 1. deildinni með 30 mörk og síðan leiddi hann lið Argentínu til langþráðs sigurs í Suður-Ameríkukeppninni, Copa America.
Robert Lewandowski, sóknarmaður Bayern München og pólska landsliðsins, hafnaði í öðru sæti en hann var fyrr í kvöld útnefndur sóknarmaður ársins af France Football.
Jorginho, miðjumaður Chelsea og ítalska landsliðsins, hafnaði í þriðja sæti, Karim Benzema, framherji Real Madrid og franska landsliðsins varð fjórði og N'Golo Kanté, miðjumaður Chelsea og franska landsliðsins, hafnaði í fimmta sæti.
Chelsea var útnefnt félag ársins 2021 en karlalið félagsins varð Evrópumeistari og kvennaliðið varð enskur meistari.