Darwin Nunez, leikmaður Liverpool, er á óskalista Barcelona ef marka má enska götublaðið the Sun.
The Sun greinir frá þessu í dag en Nunez hefur staðið sig ágætlega í vetur og leggur sig ávallt fram í sóknarlínunni.
Margir eru þó orðnir þreyttir á leikmanninum fyrir framan markið en hann á það til að klúðra dauðafærum í leikjum sem hefur kostað þá rauðklæddu í vetur.
Samkvæmt Sun telur Barcelona að Nunez gæti hentað sem arftaki Robert Lewandowski ef Pólverjinn færir sig um set í sumar.
Lewandowski verður launahæsti leikmaður Börsunga á næsta tímabili og eru góðar líkur á að félagið reyni að losa sig við framherjann.